Gjykata Themelore e Prishtinës ka vazhduar masën e paraburgimit ndaj dy të dyshuarve për vrasjen e  16 vjecarit, Aulon Zeka.

Dy të miturit, të dyshuar për vrasje të rëndë do të vazhdojnë të qëndrojnë në paraburgim edhe për dy muaj.

Lajmin për Arbresh.info e ka bërë të ditur Prokuroria Themelore në Prishtinë.

Zëdhënësi i kësaj prokurorie, Ekrem Lutfiu,  ka thënë se Prokuroria Themelore në Prishtinë ka pranuar  vendimin e gjykatës dhe se është aprovuar kërkesa e prokurorisë për vazhdimin e masës së paraburgimit ndaj të dyshuarve edhe për dy muaj të tjerë.

“  Më 17.10.2017, kemi pranuar vendimin nga Gjykata Themelore Prishtinë, për vazhdimin e paraburgimit. Paraburgimi ndaj të miturve të lartcekur është vazhduar për 2 muaj, dhe atë deri më 17.12.2017”, thotë Lutfiu për Arbresh.info.

Ndërkohë Prokuroria Themelore në Prishtinë – Departamenti për të Mitur, më 13.10.2017, kishte bërë kërkesë për vazhdimin e paraburgimit ndaj të miturve G.H dhe R.G, për shkak të veprës penale vrasje e rëndë nga neni 179  pika 1.1 dhe 1.4 lidhur me nenin 31 të KPRK-së.

Ndryshe, 16 vjeçari Aulon Zeka është gjetur i vdekur në mëngjesin e 16 shtatorit   rreth orës 11:00, në rrugën “Gjon Sereqi” në Prishtinë.  I ndjeri ishte qëlluar me katër plumba në trup.

Një ditë më vonë, Policia e Kosovës pati arrestuar dy të mitur si të dyshuar për vrasjen e të miturit dhe që nga ajo ditë të njëjtit vazhdojnë të qëndrojnë në paraburgim./ Arbresh.info/ Gita Lushi